Shayi Shanan Nsen

Shaning aten ni tsawm ra na mat wa ai hte ahhte KWAT ni a asak mung, Shi langai (11)ning kaw rai taw sai. Bai maram sam yu ai shaloi, mungdan kata de, dang di lu ai daram, hkamja lam masing hta, tsi gawk mung hpaw la lu ga ai. Machye machyang rawt jat wa lu na matu, atsam sharawt ya ai Wunkat ni mung wa galaw la lu sai.

Mungdan shinggan de mung, mungdan kata na ramma ni grau kung zet wa lu na matu, ramma n kau mi hpe shaga la nhtawm, Internship hpaw sharin ya ai hte n kau mi hpe gaw, School for Shan State Nationalities Youth, Earth Rights School of Burma, hkan jawng lung la lu na matu, mahkrun tam ya ga ai. Dai hta n-ga madang grau tsaw ai hpaji sharin la lu na matu, India Dakkasu de sa lung lu na matu mung lam tam ya ga ai.

Mungdan kata kaw nna, Mi wa mung de dut sha hkrum ai myu shayi ni hte seng ai lam, ‘Driven Away’ hte ‘Eastward Bound’ laika book ni hpe mung, mungkan na ni chye na matu lu ka shapraw saga ai.

Dai hta n-ga, Bu htawt bungli galaw ai ni hpe garum ai masing hte masat masa ga shaka laika hta shinggyin lam hte sawk sagawn ai lamang ni hpe galaw nga ga ai.

Shang gumhpraw tam masing lam hta mung, rep chywi bungli, Htung hking ri da maka hte Htung hking hte seng ai gunrai shapraw ai lam ni galaw lu ga ai. Anhte KWAT ni hku nna, myusha ni a matu, akyu rawng na lam ni hpe dang di lu ai daram shakut nga ga ai.

Ya ndai Shayi Shanan hta gaw, Mung masa galaw saga nga ai ga baw, Ra Lata poi ngu ai lam hte kaga hpaji la na ga baw ni hpe bai hti yu ga.

Lahtaw Nang Yin
Editor
Shayi Shanan Newsletter
Kachin Women’s Association Thailand

Click here to download full Newsletter.