Shayi Shanan Nsen

Prat madang dep rawt jat wa ai hte maren, rap ra ai lam nnga kahtet kamawt gali galaw kyin dut yak hkak ai lam ni hte kanyi kanga byin taw nga ai Mungkan hta, myu shayi madang gaw, ka ang hkup jan nga taw sai.

Ngwi pyaw sim sa ai Mungkan bai byin wa lu na matu, gawgap ai hta myu shayi ni a galaw lu ai atsam gaw, grai ahkyak la nga ai.

Dai ni na Mungkan kaw myu shayi madang grau law ai hte maren, bungli mung grau law dik galaw nga ma ai. Raitim myu shayi ni galaw ai lam ni gaw n dan n leng sha rai taw nga ai.

Ginhka hkrum ai hte dip tawn hkrum ai lam ni hpe lu hparan yang sha, myu shayi ni a madu galaw lu ai ahkang hte galaw lu ai atsam ni rawt jat wa lu na hku rai nga ai.

Dai ginhka hkrum ai lam kaw na lawt lu na matu hte, madu a galaw lu ai ahkang lu na matu, myu shayi ni hta, mung masa lam, sut masa lam, shinggyim masha ni hpe akyu jaw ai myit jasat hpaji hparat, sha wang myit kaba hte kung kyang ai lam ni nga ra nga ai.

Dai rai nna, anhte myu shayi ni grai shakut shaja ra ai majaw, anhte KWAT ni jut mi hku nna sha hpyi garum lu na matu, myu shayi hte myu shadang sha ni n-ginhka hkat ai sha rau chye ganawn let, ra ai bungli ni hpe chye chyawm galaw hparan mat wa lu na matu, myu shayi hte myu shadang sha ni hpe rau Intern jawm sharin ya mat wa ga ai.

Dai hta n-ga maigan mungdan de bungli sa galaw na pru sa wa ai Jinghpaw Wunpawng myu sha ni ru yak jam jau hkrum ai ni hpe dang di ai made garum la lu na matu yaw shada let, KWAT kaw nna, “Migrant Program” hpe hpaw tawn let, garum shingtau la nga saga ai.

Anhte Jinghpaw Wunpawng amyu sha ni yawng myit hkrum ra ai ngu ai hpe madung dat let, gahkyin gumdin hkawm sa wa ga.

Lahtaw Nang Yin
Editor
Shayi Shanan Newsletter
Kachin Women’s Association Thailand.

Click here to download full newsletter.