Shayi Shanan Nsen

Shinggyim wuhpawng hta chye chyang kung hpan hpaji chye ai ramma shayi shadang sha ni law htam wa yang sha, myu sha ni rawt jat wa na re.

Dai majaw, anhte KWAT ni hku nna, ramma shayi shadang sha ni grau atsam rawt jat wa lu na matu, Internship Program hpaw nna, sharin ya nga ga ai gaw 12 lang rai sai. Ya mung matut hpaw nga ga ai.

Ya hte 29th August 2011- 1st September 2011 laman hta KWAT a Migrant Program kaw nna mung, Bu htawt bungli galaw ai ni hpe “Reproductive Health Training” jaw ngut sai re.

Ya ndai mungkan hta mung, shinggyim hkrang n bung ai a ntsa, lachyen lahka lam n nga wa hkra myu shayi wuhpung wuhpawng ni yawng jawm shakut nga ai kaw, ya Thai mung a Hkringmang Daju mung, myu shayi tai wa ai majaw, anhte myu shayi ni hku nna, grai n-gun lu hpa rai nga ai.

Anhte KWAT hku nna mung, myu sha ni grau atsam rawt jat wa na matu, dang lu ai jut kaw nna shakut shaja nga ai ten hta, buga de hpyen majan kasat gala nsen bai ngoi pru wa ai majaw, mung masha ni tinang dum nta, U, Wa yamnga, Yi sun Hkauna ni hpe tawn kau da nhtawm, asak lawt daw hprawng bra pru wa ma ai. Myen hpyen dap ni bai rai yang gaw, kahtawng hkan porter lahkawn ai, num sha ni hpe roi rip ai hte zing ri sat ai lam ni galaw ai a majaw, kahtawng kaw, Mung masha ni n mai nga mat wa ai hte hpyen hprawng hprawng ra mat wa ai hku rai nga ai. Dai majaw, anhte KWAT ni hku nna mung, majan lawan shazim nhtawm Amyu bawsang ni nga ai shara shagu na, Myen hpyen dap ni hpe dawm la kau na, num ni hpe roi rip ai lam jahkring na lam ni hte seng nna, 17th June 2011 hta, “ Kachin Women denouncing offensive by the Bumese Army and atrocities against Kachin people” Statement hpe shapraw sai re.

Ya na zawn hpyen hprawng hprawng ai ni, shara shagu chyam bra taw nga sai majaw, anhte KWAT kaw nna gaw, media hku nna mung, lu lawm ai kaw na ja gumhpraw hku nna mung, dangdi dangdep lu ai maga hku, ra ai shara hkan garum shing tau ai lam ni hpe galaw nga ga ai.

Anhte kadai mung ya na zawn yak hkak hkrum nga ai Jinghpaw Wunpawng myusha ni hpe, tinang Dangdi dangdep ai hku jawm garum la ga ngu, ga saw dat ga ai law.

Shayi Shanan Newsletter
Kachin Women’s Association Thailand

Click here to download full newsletter.